Presidenti i Kosovës, Hashim Thaçi pas komentit të Komisionit të Venecias ka reaguar duke thënë se për dallim nga qeveria e Albin Kurtit, i cili edhe e dërgoi kërkesën për vlerësim në këtë komision, kjo e fundit i beson gjykatës sonë.

Tutje presidenti ka shprehur disponueshmërinë për të bashkëpunuar me autoritetet për çështje që janë në kompetencën e tyre, transmeton portali arbresh.info.

“Komisioni i Venecias kundërshtoi kërkesën e Qeverisë për interpretimin e Kushtetutës, ndërsa e njëjta çështje është në pritje të Gjykatës Kushtetuese. Për ndryshim nga Qeveria e shkarkuar, Komisioni i Venecias shpreh besim dhe mbështetje të plotë për gjykatën tonë. Në të njëjtën kohë, shpreh disponueshmërinë për të bashkëpunuar me autoritetet e Kosovës për çështje të tjera që janë në kompetencën e tyre. Respektimi i vendimeve dhe autoritetit të Gjykatës Kushtetuese është thelbësor për sundimin e ligjit në Kosovë! HTH”, thuhet në reagimin e Thaçit.

Në njoftimin që ka bërë qeveria në detyrë kanë bërë me dije se Komisioni ka vlerësuar që të respektojë vendimmarrjen e Gjykatës Kushtetuese.

“Pasi Gjykata Kushtetuese ka marrë vendim për vendosjen e masës së përkohshme deri më 29 maj, duke e pezulluar veprimin e Dekretit të Presidentit, dhe meqë Gjykata po e trajton këtë çështje, Komisioni ka vlerësuar që të respektojë vendimarrjen e Gjykatës Kushtetuese, pasi veçse ka vepruar. Ne e mirëpresim sugjerimin e Komisionit për të respektuar e pritur shqyrtimin e kërkesës dhe vendimin e Gjykatës Kushtetuese. Pas trajtimit nëse shihet nevoja për sqarime shtesë dhe ndihmë për opinion nga Komisioni, do të ndërmarrim hapat e nevojshëm”, thuhej në njoftim./arbresh.info/